Språkpolitiske utvalg ved NTNU

Rett og godt språk er avgjerande for kvaliteten i heile NTNUs faglege og administrative verksemd. Me må ha ein aktiv språkpolitikk som sørgjer for at språkbruken ikkje berre er i tråd med gjeldande lover og reglar, men også med forventningane hos studentar, tilsette og samfunnet rundt oss.

Dels handlar det om å vareta språklege rettar og lovkrav, dels om å utvikla språkkompetansen til medarbeidarane og å styrkja norsk som fagspråk. For eit stort universitet som har mange studentar og tilsette med eit anna førstespråk enn norsk, dreier det seg også om å praktisera parallellspråklighet når det trengst for å sikra inkludering og mangfald.

Dei språkpolitiske retningslinjene for NTNU skal bidra til dette. For å følgja med på språksituasjonen og vera ein ressurs i gjennomføringa av retningslinjene, har rektor oppretta eit rådgivande språkpolitisk utval, som skal 

- følgja med på språksituasjonen ved NTNU og gi rektor råd i språkpolitiske spørsmål;

- foreslå tiltak som bidreg til å oppfylla NTNUs språkpolitiske retningslinjer;

- ta initiativ til og formidle informasjon om språkressursar for studentar og tilsette;

- bidra til å auka forståinga for og interessa for god språkbruk ved NTNU. 

Språkpolitisk utval blir utnemnt av rektor for tre år av gongen og består av 5-7 medlemmer. Leiaren bør ha relevant språkvitskapleg kompetanse. Utvalet elles blir sett saman slik at 

- både fast og mellombels vitskapleg tilsette og dessutan studentane er representerte;

- teknisk-administrativt tilsette er representert;

- minst éin av medlemmene har eit anna førstespråk enn norsk;

- utvalet samla sett speglar NTNUs mangfald og faglege breidd. 

Alle utvalsmedlemmer kan sitja i inntil to periodar. Utvalet rapporterer til rektor gjennom ein årsrapport om verksemda som også inneheld ei vurdering av den aktuelle språksituasjonen ved NTNU.

Utvalet har sekretariat i fellesadministrasjonen.